Azı 12 nəfərin həlak olduğu bildirilir

Avstraliyanın Sidney şəhərindəki Bondi çimərliyində yəhudi festivalına hücum olub. Yerli medianın verdiyi məlumata görə, azı on iki nəfər həlak olub. Polis mətbuat konfransında bildirib ki, hücum edənlər iki nəfər olub, onlardan biri zərərsizləşdirilib. Hakimiyyət orqanları bunu Hanuka bayramının ilk günündə Sidneydəki yəhudi icmasını hədəf alan terror hücumu adlandırır.

İki polis məmuru da daxil olmaqla iyirmi doqquz yaralı xəstəxanaya aparılıb. İkinci silahlı şəxsin vəziyyəti ağırdır. Polis üçüncü hücumçunun olub-olmadığını araşdırır.

Avstraliya mediasının məlumatına görə, şahidlər yerli vaxtla saat 18:30-dan qısa müddət sonra iki kişinin nəqliyyat vasitəsindən düşərək körpüdən ağır silahlarla atəş açdığını bildiriblər. Ərazidə Hanuka bayramını qeyd edən yəhudi festivalına qatılan təxminən 1000 nəfərlik izdiham var imiş.

Şahidlərin sözlərinə görə, atışma ən azı 10 dəqiqə davam edib.